Düzgün.az xəbər verir ki, 27 Sentyabr-Anım günü ilə bağlı Kürdəmir Rayon Mərkəzi Xəstəxanasının akt zalında geniş tədbir keçirilib.Tədbirdə xəstəxananın direktoru Elçin Bilalov, xəstəxananın kollektivi və şəhid valideynləri iştirak edib.
Əvvəlcə Azərbaycanın ərazi bütövlüyünün və suverenliyinin bərpası uğrunda mübarizədə şəhid olanların xatirəsi bir dəqiqəlik sükutla yad olunub.
Tədbiri giriş sözü ilə açan xəstəxananın direktoru E.Bilalov şəhidlərimizə Allahdan rəhmət, ailələrinə səbir diləyib.Bildirib ki, 27 sentyabr hərbi-siyasi gücümüzün, milli ruhumuzun və milli həmrəyliyimizin təntənəsi olan böyük Zəfər qələbəsinin təməlinin qoyulduğu şərəfli bir tarixdir.Prezident, Müzəffər Ali Baş Komandan İlham Əliyevin rəhbərliyi altında 44 günlük Vətən müharibəsində şanlı tarix yazan oğullarımızın, şəhidlərimizin, qazilərimizin döyüş yolu onların hər birinin bir qəhrəman olduğunu və bu gün hər kəsin onlarla fəxr etdiyini, qürur duyduğunu qeyd edib.
Daha sonra xəstəxananın işçiləri, şəhid Cəmil Həşimlinin və Fərid Məmmədovun anaları Simuzər Həşimli, Kifayət Məmmədova çıxış edərək vurğulayıblar ki, şəhidlərin qanı yerdə qalmayıb. Azərbaycanın qəhrəman ordusu onların qisasını layiqincə alıb. Qəhrəman hərbçilərimizin şücaəti, rəşadəti hesabına, şəhidlərimizin qanı-canı bahasına bütün dünyanın Azərbaycanın şanlı qələbəsinin şahidi olduğunu, vətənimizin ərazi bütövlüyünün bərpa olunduğunu, üçrəngli bayrağımızın işğaldan azad edilən torpaqlarımızda dalğalandığını, bütün bunlara görə qalib Ali Baş Komandana, şəhidlərimizə və qazilərmizə minnətdar olduğumuzu vurğulayıblar.
Sonda 27 Sentyabr – Anım Günü ilə bağlı videoçarx nümayiş olunub .
Səbuhi Eltonlu
