Düzgün.az xəbər verir ki, 27 sentyabr 2025-ci il tarixdə Göyçay şəhər Şəhidlər Xiyabanında Göyçay rayon İcra Hakimiyyətinin təşkilatçılığı ilə 27 sentyabr Anım Günü münasibətilə tədbir keçirilib.
Tədbirdə rayon İcra Hakimiyyətinin başçısı Natiq Ağayev, Milli Məclisin deputatları Məzahir Əfəndiyev, Sabir Hacıyev, hüquq-mühafizə orqanlarının, rayonda fəaliyyət göstərən idarə, müəssisə və təşkilatların rəhbərləri, YAP rayon təşkilatının sədri, şəhid ailələrinin üzvləri, qazilər, müharibə veteranları, rayon ictimaiyyətinin nümayəndələri iştirak ediblər.
Əvvəlcə tədbir iştirakçıları şəhidlərin məzarları üzərinə gül dəstələri düzərək xatirələrini yad ediblər.
Azərbaycan Respublikasının dövlət himninin səslənməsi ilə başlanan tədbirdə Göyçay Rayon İcra Hakimiyyətinin başçısı Natiq Ağayev çıxış edərək şəhidlərimizə Allahdan rəhmət, ailələrinə səbir diləyib. Bu gün bütün Azərbaycan xalqı və dünya azərbaycanlıları müqəddəs vətənimiz uğrunda canından keçən şəhidlərimizin xatirəsini dərin ehtiramla andığını vurğulayıb. Ermənistanın Azərbaycana qarşı növbəti hərbi təcavüzünün qarşısını almaq məqsədilə 2020-ci il sentyabrın 27-dən Azərbaycan Respublikasının Silahlı Qüvvələri bütün cəbhə boyu əks-hücum əməliyyatına başladığını Azərbaycan Respublikasının suverenliyi və ərazi bütövlüyü uğrunda gedən mübarizədə rəşadət göstərən əsgər və zabitlərimiz, arxa cəbhədə çalışan mülki insanlarımız yüksək əzm və iradə göstərərək, Müzəffər Ali Baş Komandan İlham Əliyevin ətrafında yumruq kimi birləşərək, düşmənə sarsıdıcı zərbələr endirdiyini diqqətə çatdırıb.
Daha sona Milli Məclisin deputatları Məzahir Əfəndiyev, Sabir Hacıyev, şəhid Xəyyam Hüseynovun atası Hüseyn Hüseynov, şəhid Orxan Kərimlinin atası Akif Kərimov və rayon ziyalıları adından qabaqcıl tarix müəllimi Firəngiz Məmmədyarova çıxış edərək 27 sentyabr hərbi-siyasi gücümüzün, milli ruhumuzun və milli həmrəyliyimizin təntənəsi olan böyük Zəfər qələbəsinin təməlinin qoyulduğu şərəfli bir tarix olduğunu bildiriblər. Prezident, Müzəffər Ali Baş Komandan İlham Əliyevin rəhbərliyi altında 44 günlük Vətən müharibəsində şanlı tarix yazan oğullarımızın, şəhidlərimizin, qazilərimizin döyüş meydanında onların hər birinin bir qəhrəman olduğunu və bu gün hər kəsin onlarla fəxr etdiyini, qürur duyduğunu qeyd ediblər.
Saat 12:00-da vətən müharibəsində qəhrəmancasına döyüşmüş, ölkəmizin ərazi bütövlüyü yolunda canlarını fəda etmiş bütün şəhidlərimizin xatirəsi bir dəqiqəlik sükutla yad edilib, şəhər ərazisində nəqliyyat vasitələrinin və piyadaların hərəkəti dayandırılıb.
Tədbir iştirakçıları sonda şəhidlərin xatirəsinin uca tutulması məqsədilə ağacəkmə kampaniyasında iştirak ediblər.
Səbuhi Eltonlu
