Düzgün.az xəbər verir ki, Dövlət İmtahan Mərkəzi (DİM) rezidenturaya qəbul olmaq istəyən namizədlər üçün qəbul imtahanının ikinci mərhələsi (ixtisas fənləri) üzrə sınaq imtahanı təşkil edəcək.
Bu barədə DİM-dən məlumat verilib.
Sınaq imtahanında iştirak etmək istəyənlər iyulun 3-ü saat 11:00-dan iyulun 13-ü saat 11:00-dək DİM-in internet saytında qeydiyyatdan keçərək imtahana yazıla bilərlər.
Sınaq imtahanı iyulun 17-də Bakı şəhərində DİM-in elektron imtahanlar korpusunda (Binəqədi rayonu, S.S.Axundov küçəsi, 50) elektron formada keçiriləcək və saat 11:00-da başlanacaq.
Sualların cavablandırılmasına 2 saat 30 dəqiqə vaxt ayrılır. Sınaq imtahanında iştirak etmək üçün ödənişin məbləği 50 (əlli) AZN-dir. İmtahanda iştirak etmək istəyən şəxsin DİM-in internet saytında “Şəxsi kabinet”i olmalıdır. Kabinet yaradılan zaman onun pul hesabı da açılır. Ödəniş üçün nəzərdə tutulan məbləği “Şəxsi kabinet”də olan hesaba daxil etmək üçün müxtəlif ödəniş üsullarından (ətraflı məlumat “payment.dim.gov.az” saytında verilib) yararlanmaq olar.