Xəbər verdiyimiz kimi, Orxan Çingiz oğlu Mürsəlov Göyçay Rayon İcra Hakimiyyətinin başçısı vəzifəsinə təyin edilib.
“Düzgün.az”-ın məlumatına görə, Mürsəlov Orxan Çingiz oğlu 26 iyul 1986-cı il tarixində Rusiya Federasiyasının Bryansk şəhərində anadan olub.
1993–2004-cü illərdə Bakı şəhərindəki 95 saylı tam orta məktəbdə təhsil alıb. 2004–2008-ci illərdə Azərbaycan Respublikasının Prezidenti yanında Dövlət İdarəçilik Akademiyasının Siyasi idarəetmə fakültəsini politologiya ixtisası üzrə bitirib.
2008–2009-cu illərdə Dövlət Sərhəd Xidmətində həqiqi hərbi xidmətdə olub. 2010–2012-ci illərdə Azərbaycan Dövlət İqtisad Universitetində (MBA) Biznesin idarəedilməsi – marketinq ixtisası üzrə magistr dərəcəsi alıb. 2010–2022-ci illərdə Prezident Administrasiyasının Sənədlərlə və vətəndaşların müraciətləri ilə iş şöbəsində və Ərazi-təşkilat məsələləri şöbəsində müxtəlif vəzifələrdə çalışıb.
Azərbaycan Respublikasının Prezidenti İlham Əliyevin 11 avqust 2022-ci il tarixli sərəncamı ilə Gədəbəy Rayon İcra Hakimiyyətinin başçısı vəzifəsinə təyin olunub. Azərbaycan Respublikasının Prezidenti İlham Əliyevin 12 noyabr 2025-ci il tarixli sərəncamı ilə Gədəbəy Rayon İcra Hakimiyyətinin başçısı vəzifəsindən azad olunub, Prezidentin digər sərəncamı ilə Göyçay Rayon İcra Hakimiyyətinin başçısı təyin edilib.
Türk, ingilis və rus dillərini bilir.
Səbuhi Eltonlu