Düzgün.az xəbər verir ki, Göyçayda sahibsiz itlərin qorunması və onlara qayğı göstərilməsi məqsədilə nümunəvi təşəbbüs həyata keçirilib.
Belə ki, Göyçay sakini Mustafayeva Könül Əjdər qızının təşkilatçılığı ilə bu ilin avqustda rayonun Qarabaqqal kəndi ərazisində it sığınacağı fəaliyyətə başlayıb.
Hazırda sığınacaqda 100-ə yaxın sahibsiz it yerləşdirilib. Burada heyvanların quduzluğa qarşı vaksinləşdirilməsi, qısırlaşdırılması və veterinar nəzarət altında vilkalanması mütəmadi şəkildə aparılır.
Sığınacaqda həmçinin sanitar-gigiyenik qaydalara ciddi riayət olunur, itlərin vaxtında və düzgün şəkildə qidalanması təmin edilir. Ərazidə təmizlik və təhlükəsizlik məsələlərinə xüsusi diqqət yetirilir.
Qeyd edək ki, layihənin həyata keçirilməsində Göyçay Rayon İcra Hakimiyyətinin başçısı Natiq Ağayevin dəstəyi mühüm rol oynayıb. Onun dəstəyi sayəsində sığınacağın fəaliyyəti üçün lazımi şərait yaradılıb və işlərin davamlılığı təmin olunub.
Bu təşəbbüs sahibsiz itlərin cəmiyyətdə qorunmasına xidmət edir. Göyçayda həyata keçirilən bu nümunəvi layihə digər bölgələr üçün də təşəbbüsə dəyər bir model hesab olunur.
Heyvansevər şəxslər, yerli qurumlar və ictimai təşkilatlar bu kimi xeyirxah işlərə dəstək verməyə çağırılır.
