Düzgün.az xəbər verir ki, Birinci Qarabağ müharibəsində itkin düşdüyü hesab edilən və şəxsiyyəti müəyyənləşdirilən daha bir şəhid dəfn olunacaq.
Bu barədə Əsir və itkin düşmüş, girov götürülmüş vətəndaşlarla əlaqədar Dövlət Komissiyası məlumat yayıb.
Belə ki, Mırtı kənd sakini Nuriyev Aydın Nəriman oğlu 30 oktyabr 2025-ci il tarixində saat 15:00-da Göyçay şəhər Mırtı kənd qəbiristanlığında dəfn ediləcək.
Qeyd edək ki, şəhidimiz 5 noyabr 1966-cı ildə Göyçay rayonunun Mırtı kəndində anadan olub. Orta məktəbin səkkizinci sinfini bitirdikdən sonra Bakı Yüngül Sənaye Texnikumunda təhsil alıb. Daha sonra hərbi xidmətini keçmək üçün Rusiya Federasiyasının Murmansk vilayətinə yollanıb.
1988-ci ildə hərbi xidmətini başa vuraraq vətənə dönən Aydın Nuriyev Xocalı Tikiş Fabrikində əmək fəaliyyətinə başlayıb. 1992-ci ildə Milli Qəhrəman Tofiq Hüseynovun rəhbərlik etdiyi Xocalı könüllü müdafiə batalyonunun tərkibinə qoşulub və Vətənin müdafiəsinə qalxıb. Həmin ilin fevralında Xocalı döyüşləri zamanı itkin düşüb.
About the Author
