Düzgün.az xəbər verir ki, 12 sentyabr 2025-ci il tarixdə Birinci Qarabağ müharibəsində itkin düşmüş və şəxsiyyəti müəyyənləşdirilmiş Göyçay rayonunun Potu kənd sakini, Ayaz Əsgəralı oğlu Zərbalıyevin nəşinin qalıqları dəfn olunmaq üçün doğulduğu Potu kəndinə gətirilib.
Şəhidlə vida mərasimində rayon İcra Hakimiyyətinin başçısı Natiq Ağayev, RİH başçısı aparatının məsul şəxsləri, hüquq-mühafizə orqanlarının, rayonda fəaliyyət göstərən idarə, müəssisə və təşkilatların rəhbərləri, Vətən müharibəsinin iştirakçıları, şəhid ailələri, dindarlar, ağsaqqallar, şəhidin ailə üzvləri, kənd sakinləri və ictimaiyyət nümayəndələri iştirak ediblər.
Cənazə namazı qılındıqdan sonra şəhidin nəşi Göyçay şəhər Şəhidlər Xiyabanına gətirilib, torpağa tapşırılıb və dualar oxunub. Dəfn zamanı hərbi orkestrin müşayiəti ilə Dövlət Himni ifa olunub və yaylım atəşi açılıb.
Sonra Rayon İcra Hakimiyyətinin başçısı Natiq Ağayev şəhidin tabutuna bükülmüş Azərbaycanın üçrəngli bayrağını qardaşı Müşviq Zərbalıyevə təqdim edib.
Qeyd edək ki, Şəhid Zərbalıyev Ayaz Əsgəralı oğlu 08 yanvar 1969-cu ildə Göyçay rayonunun Potu kəndində anadan olub. 1987-ci ildən 1989-cu ilədək Sovet İttifaqının Ukrayna Respublikasının Zaporojye şəhərində hərbi xidmətdə olub. 1992-ci ildə səfərbərlik üzrə xidmətə cəlb edilərək Azərbaycan ordusunda hərbi xidmətə çağrılıb, Ağdərənin və Kəlbəcərin müdafiəsi uğrunda gedən döyüşlərdə fəal iştirak edib və böyük şücaət göstərib. 30 mart 1993-cü ildə Kəlbəcər rayonunun Çələkdar kəndi uğrunda gedən döyüşlərdə itkin düşüb. Göyçay rayon Məhkəməsi tərəfindən 2007-ci ildə şəhidlik status verilməsi haqqında qərar qəbul edilib.
