Düzgün.az xəbər verir ki, rayonun Bığır və Hacalıkənd kəndlərində içməli sudan qanunsuz istifadə hallarının aradan qaldırılması məqsədilə monitorinqlər aparılıb.
Belə ki, içməli sudan səmərəli və qənaətlə istifadə, sudan qanunsuz istifadə hallarının aradan qaldırılması, həmçinin sakinlər arasında maarifləndirmə işlərinin aparılması məqsədilə Göyçay Rayon İcra Hakimiyyəti başçısının Qarabaqqal və Bığır kənd inzibati ərazi dairələri üzrə nümayəndəliklərin, kənd bələdiyyələrinin və Göyçay Su Meliorasiya Sistemləri İstismarı İdarəsinin əməkdaşlarının iştirakı ilə rayonun Bığır və Hacalıkənd kəndlərində monitorinq aparılıb.
Aparılan monitorinq zamanı qanunsuz və nəzarətdənkənar qoşulmalar aşkar edilmiş, özbaşına çəkilmiş xətlər və qoşulmalar ləğv edilərək vətəndaşlara xəbərdarlıq olunub.
Keçirilmiş monitorinq zamanı vətəndaşlara su təchizatı sahəsində qanunvericiliyin tələbləri və onun pozulması halları barədə məlumat verilib.
Vətəndaşları bir daha bu cür əməllərdən çəkinməyə çağırır və bildiririk ki, belə qanunazidd halların qarşısını almaq üçün tədbirlər mütəmadi davam etdiriləcək, özbaşına çəkilmiş xətlər ləğv olunacaq, belə halları təkrar törədənlərlə bağlı hüquq-mühafizə orqanlarına müraciət olunacaq.
