Azərbaycan Özbəkistan əlaqələri dərin köklərə əsaslanan əlaqələr müstəvisində uğurla inkişaf edir. İki ölkəni qədim tarix birləşdirir və bu təməl qarşılıqlı fəaliyyətin inkişafı üçün əsasdır. Ən önəmli məqamlardan biri isə əlbəttəki xalqlarımızın tarixi bağlılığı, dərin köklərə söykənən ənənələrlə yanaşı, Azərbaycan və Özbəkistanın türk dünyasının bir parçası kimi daha da yaxınlaşması,qarşılıqlı əlaqələrin daha da sıx olması üçün atılan addımlardır. Bu münasibətlərin möhkəmlənməsi isə təbii ki, türk dünyasına verilən böyük töhfələrdən biridir.
Qeyd edək ki hər iki ölkə 1991-ci ildə müstəqillik qazandıqdan sonra öz dövlətçilik ənənələrini qurarkən bir-biri ilə dostluq münasibətlərini inkişaf etdirməyə başlamışdır. 2024-cü ildə isə Daşkənddə imzalanan qarşılıqlı müttəfiklik fəaliyyəti haqqqında Müqavilə münasibətlərdə dönüş nöqtəsi olub.
Fəxrlə qeyd etmək olar ki, möhkəm dostluq və qardaşlıq üzərində qurulmuş bu əlaqələr hər keçən gün daha da inkişaf edir və yeni məzmunla zənginləşir. Sözsüz ki, bu münasibətlərin təməlində Ümummilli Lider Heydər Əliyevin danılmaz xidmətləri böyük olmuşdur. Bu gün xalqlarımız arasında yenilməz dostluq və qardaşlıq münasibətlərinin yüksələn xətt üzrə inkişafı məhz bu varislik prinsipləri əsasında həyata keçirilən uğurlu siyasətin davamıdır.
İyulun 2-də Özbəkistan Respublikasının Prezidenti Şavkat Mirziyoyevin Azərbaycana dövlət səfəri iki ölkə arasında bağların daha da gücləndiyini bir daha təsdiq edir. Prezidentlərin təkbətək görüşü, həmçinin Prezident İlham Əliyevin Şavkat Mirziyoyevin iştirakı ilə Azərbaycan-Özbəkistan Ali Dövlətlərarası Şuranın ikinci iclasının keçirilməsi, bir çox sənədlərin mübadiləsi münasibətləri daha da möhkəmləndirir.
Prezident İlham Əliyev mətbuata bəyanatında bildirdi ki, bu gün Özbəkistan və Azərbaycan münasibətlərinin tarixində əlamətdar gündür. Özbəkistan Prezidentinin dövlət səfəri layiqincə qardaşlıq və qarşılıqlı anlaşma ab-havasında keçir. Bu gün biz həm ikitərəfli görüş, həm də Dövlətlərarası Şuranın iclası çərçivəsində ikitərəfli qarşılıqlı fəaliyyət məsələlərinin geniş spektirini müzakirə etdik, münasibətlərimizin strateji müttəfiqlik xarakterini bir daha təsdiqlədik. Münasibətlər qarşılıqlı hörmət və strateji baxış üzərində qurulub. Keçən il Daşkənddə imzalanmış müttəfiqlik münasibətləri əsasında müqavilə artıq real nəticələr verməyə başlayıb.
Prezidentlərin mətbuata verdiyi mesajlar bir daha gösdərir ki, iki ölkə yalnız bu gün üçün deyil, gələcək on illiklər üçün də ortaq hədəflər, böyük planlar qurur. Azərbaycan Özbəkistan münasibətlərini dərinliyini göstərən mühüm detallardan biri də ondan ibarətdir ki, iki ölkə liderlərinin görüşləri yalnız rəsmi hissə ilə kifayətlənmir, həm də şəxsi münasibətləri ilə əmakdaşlığı gücləndirirlər. “Biz hökumət üzvlərinə tapşırıq verdik ki, öz işlərini ləyaqətlə yerinə yetirsinlər. Bilsinlər ki biz mütəmadi olaraq monitorinq aparıb yoxlayacağıq, bunu da edirik”. Sözsüz ki, bu cür davamlı nəzarət və şəxsi məsuliyyət hissi ikitərəfli əməkdaşlığın inkişafının əhəmiyyətini bir daha səciyyələndirir.
Azərbaycan və Özbəkistan arasında iqtisadi əlaqələr xüsusilə enerji, nəqliyyat, logistika, kənd təsərrüfatı və sənaye sahalərində dinamik inkişaf edir. Zəngəzur Dəhlizi layihəsi və Özbəkistanın Orta Dəhlizə marağı ölkələrimiz arasında geo-iqtisadi enerji yaradır. Prezident İlham Əliyev bildirdi ki, iki ölkə nəqliyyat və logistika sahəsində koordinasiyalı fəaliyyətə sadiqdir: “Biz, həmçinin bu günkü imkanları və Xəzərdən Azərbaycana, oradan isə qərbə çıxışı olan Mərkəzi Asiya regionunda daha geniş və şaxələndirilmiş nəqliyyat infrastrukturunun yaradılmasına gətirib çıxaracaq gələcək layihələri nəzərə alaraq, nəqliyyat və logistika sektorunu ətraflı nəzərdən keçirdik. Biz infrastrukturumuzun böyük həcmdə yükləri qəbul etməyə hazır olması baxımından layihələrimizi ikitərəfli formatda əlaqələndirməyi davam etdirməklə yanaşı, həm də qonşu ölkələrlə çoxtərəfli formatda nəqliyyat siyasətinin əlaqələndirilməsi üzrə müntəzəm dialoq və iş aparamağa razılaşdıq deyə-prezident nitqində vurğuladı.
Beləliklə iyulun 2-dəki görüş, iki ölkə arasında imzalanan sənədlər münasibətlərdə yeni dönəm yaratmaqla yanaşı,həm də gələcək üçün möhkəm təməl yaradan qürurverici bir səhifəyə çevrildi.
Düzgün.az