Düzgün.az xəbər verir ki, müqəddəs Ramazan ayı münasibətilə Elm və Təhsil İşçiləri Həmkarlar İttifaqı Göyçay Rayon Komitəsi tərəfindən şəhid ailələri, müharibə əlilləri, müharibə iştirakçıları, rayon İcra Hakimiyyətinin nümayəndələri, idarə və müəssisə rəhbərlərinin iştirakı ilə iftar süfrəsi təşkil olunub.
Belə ki, 100 nəfərin iştirak etdiyi tədbir Azərbaycan Respublikasının Dövlət Himninin səsləndirilməsi ilə başlayıb, şəhidlərimizin əziz xatirəsi bir dəqiqəlik sükutla yad edilib.
Elm və Təhsil İşçiləri Həmkarlar İttifaqı Göyçay Rayon Komitəsinin sədri Kəmalə Səmədova giriş sözü ilə çıxış edərək Ramazan ayının mərhəmət, birlik və paylaşma ayı olduğunu vurğulayaraq belə görüşlərin cəmiyyətimizdə həmrəyliyin daha da möhkəmlənməsinə xidmət etdiyini bildirib.
Daha sonra Göyçay rayonu Yeniarx kəndinin imamı Ağakərim Səmədov və Qəbələ Müskürlü kəndinin imamı Yusif Aslanov çıxış edərək müqəddəs Ramazan ayının mənəvi əhəmiyyətindən danışıblar. Tədbirdə şəhidlərimizin ruhuna dualar oxunub və iftar duası edilib.
Sonra tədbirdə Yeni Azərbaycan Partiyası Göyçay rayon təşkilatının sədri Sahib Şükürov və 44 günlük Vətən müharibəsi şəhidi Orxan Kərimlinin atası Akif Kərimov çıxış edərək “On bir ayın sultanı” adlandırılan Ramazan ayının fəzilətlərindən bəhs ediblər, bu mübarək ayda həyata keçirilməsi tövsiyə edilən xeyirxah əməllərdən, mərhəmət və paylaşma kimi ali insani keyfiyyətlərdən danışıblar. Belə tədbirlərin birlik və həmrəylik baxımından böyük əhəmiyyət daşıdığını qeyd ediblər.
Sonda iştirakçılar birlik və səmimi mühitdə iftar süfrəsi arxasında bir araya gəliblər.
