Düzgün.az xəbər verir ki, Birinci Qarabağ Müharibəsində itkin düşmüş və 2026-cı ildə şəxsiyyəti müəyyən edilmiş rayonun Mastail kənd sakini Dənziyev Nail Fahil oğlunun nəşi dəfn olunmaq üçün doğulduğu Mastail kəndinə gətirilib. Şəhidlə vida mərasimində rayon icra hakimiyyətinin başçısı Əkbər Abbasov, Milli Məclisin deputatı Vasif Qafarov, Səfərbərlik və Hərbi Xidmətə Çağırış üzrə Dövlət Xidmətinin rayon şöbəsinin əməkdaşları, rayonun hüquq-mühafizə orqanlarının, idarə, müəssisə və təşkilatların rəhbərləri, şəhidin ailə üzvləri və rayon ictimaiyyətinin nümayəndələri iştirak ediblər.
Şəhidimiz yaylım atəşinin açılması ilə torpağa tapşırılıb. Daha sonra şəhid cənazəsinə bükülmüş Azərbaycan bayrağı rayon icra hakimiyyətinin başçısı tərəfindən şəhidin anasına təhvil verilib.
Qeyd edək ki, Dənziyev Nail Fahil oğlu 1974-cü ildə Lerik rayonun Mastail kəndində anadan olub. O, 1992-ci ildə hərbi xidmətə yollanmış, Birinci Qarabağ müharibəsi zamanı Ağdərə rayonunun Sırxavand kəndi uğrunda gedən döyüşlərdə iştirak etmişdir. 1992-ci ilin sentyabr ayında həmin döyüşlər zamanı itkin düşmüş və uzun illər onun taleyi barədə heç bir məlumat olmamışdır.
