Düzgün.az xəbər verir ki, 7 noyabr 2025-ci il tarixində Göyçay Dövlət Peşə Liseyinin akt zalında “Konstitusiya və Suverenlik ili” çərçivəsində “8 Noyabr – Zəfər Günü” münasibətilə tədbir və “Peşə təhsilinin şəhid məzunları” kitabının təqdimatı keçirilib.
Tədbirdə liseyin direktor əvəzi Elxan Əliyev, liseyin pedaqoji kollektivi, “Peşə təhsili və insan kapitalı” jurnalının şöbə redaktoru, yazıçı, publisist Pərvanə Mehmanlı, Yeni Azərbaycan Partiyasının Göyçay rayon təşkilatının sədri Sahib Şükürov, şəhid Kənan Ömərlinin anası liseyin müəllimi Məhluqə Ömərli, şəhid və qazi ailələrinə qayğı cəmiyyətinin sədri Eldəniz Rüstəmov, liseyin qocaman təqaüdçü müəllimi Fərhad Əliyev, Gənclərin İnkişaf və Karyera Mərkəzinin nümayəndəsi Coşqun İsmayılov, Göyçay Gənclər evinin direktoru Fərid Əkbərov, Pərvanə Mehmanlının anası Nargilə xanım, veteranlar, qazilər və tələbələr iştirak ediblər.
Tədbir Azərbaycan Respublikasının Dövlət himninin səsləndirilməsi və vətən uğrunda canından keçən şəhidlərimizin əziz xatirəsinin bir dəqiqəlik sükutla yad edilməsi ilə başlayıb.
Liseyin direktor əvəzi Elxan Əliyev çıxış edərək, “Zəfər Günü” münasibəti ilə tədbir iştirakçılarını təbrik edərək gələn qonaqlara təşəkkürünü bildirib. Şəhidlərimizə Allahdan rəhmət, ailələrinə səbir diləyib. 8 Noyabr – Zəfər Günü Azərbaycan xalqının tarixində qürur, şərəf və birlik rəmzinə çevrilmiş ən möhtəşəm hadisələrdən olduğunu qeyd edib. Azərbaycanın öz müasir tarixinin ən parlaq səhifəsini – Zəfər Gününü qeyd etdiyini vurğulayan liseyin diektoru 44 gün davam edən Vətən müharibəsinin xalqın birliyini, milli ruhun sarsılmazlığını, dövlət-xalq-ordu həmrəyliyinin gücünü bütün dünyaya nümayiş etdirdiyini vurğulayıb.
Daha sonra Sahib Şükürov, şəhid anası liseyin müəllimi Məhluqə Ömərova, Elm və Təhsil Nazirliyinin mətbu orqanı olan “Peşə təhsili və insan kapitalı” jurnalının şöbə redaktoru, yazıçı, publisist Pərvanə Mehmanlı, Eldəniz Rüstəmov, Fərhad Əliyev və Coşqun İsmayılov çıxış edərək “Bu Zəfər – igid oğullarımızın qanı, cəsarəti və xalqımızın sarsılmaz iradəsi hesabına qazanılmış müqəddəs bir qələbə,” – olduğunu diqqətə çatdırıblar. Bildiriblər ki, xalqımızın əldə etdiyi bu tarixi qələbə Ümummilli Lider Heydər Əliyevin müdrik siyasətinin və Prezident, Müzəffər Ali Baş Komandan İlham Əliyevin uzaqgörən rəhbərliyinin nəticəsidir.
Görüşdə “Peşə təhsili və insan kapitalı” jurnalının baş redaktoru Şahbaz Balakişiyev və redaksiyanın əməkdaşlarının təşəbbüsü ilə ərsəyə gələn Peşə təhsili müəssisələrinin şəhid məzunlarına həsr olunmuş “Peşə təhsilinin şəhid məzunları” kitabı təqdim edildi.
Tədbirin rəsmi hissəsi başa çatdıqdan sonra tələbələrin çıxışları ilə bədii hissə davam etdirilib.
About the Author
